Tarikh: 8/3/2020.

Tema: Kasih Allah Sebagai Titik Mula Segala sesuatu.

Teks: Kisah Para Rasul 2: 41-47.

Tempat: Gereja PCS Jemaat Nongkul.

Penyampai: Manuel Akiun.

Selamat minsosodop sokovai, nunu habal ditokou? Ombo it varot omoton na tumimpuun no mogomot. Kakal ih varo musim mongomot sampai didino gima it kuasa do Kinoringan munda tunda diti pomogounan tokou, minanahak darun, adau om barat dot pongopud dit ongoginamaan tokou. Sukul humarati tokou dit musim dit netahak sidi tokou (Elo mogimot dit pagasakan). Tema tokou biano inono: Kasih Allah sebagi titik mula segala sesuatu/ It samod do Kinoringan puun dit sokovai. Teks: KPR 2:41-49

Adau biano kening tokou boros do Kinorigan kanangan ko iti kahvazoo diti ongo ulun Kristian koripupuun sid pomogunan dot Yerusalem. Basao tokou it teks.

Umpatod

            Umpatod Kitab Usuran dit Ongorusul suput dit Kitab Injil Lukas, sinurat di Dr. Lukas, it nokovozo vozo po it pengiinjilan di Rasul Paulus (Kolose 4:14, 2 Timotius 4:11, Filemon 1:24). Sinurat dit toun 63 yadino, tomodon dit kitab pasasi dit dit ulion do pomogunan kuran it kavazoo dit kenengkakatan dit gorjia, tumimpuun dit kendohuan dit Sundu Tosusi sid Yerusalem, kenotimpunan dit piumpungan sid Yerusalem, sid Antokia, sampai sid pentongkob dit pomogunan dot Eropah Timur.

            Umpatod dit teks, hiza dit nekendahu no it sundu Tosusi, it ongo rasul kobulun no mentalang sumasi dit nemot om nokotuduk sidioti kanangan koi h Tuhan Yesus, 3 toun yoti mozo vozo di Tuhan Yesus om 40 adau monuduk ih Tuhan Yesus di nogulian no ih Tuhan Yesus. Hiza diti toun 33.  

Panarangan dit teks

Ayat 41: varot 3 ribu ot ulun minokipodsu sid ngaran di Tuhan Yesus. Ogumu meno 3 ribu dino, kokiraai enghatus tokou diti om kerad ogi. Nokuro to yaditi kogumu minokipodsu sebab iti kuasa dit Sundu dot Osusi nivaza sid tudukan di rasul Petrus hiza dit kenendohuan dit Sundu Tosusi. Kakal ih sampai biano ih Sundu Tosusi gumama sid ongo tudukan dit ongo pdt, penginjil ko iti ongo molohing sid anganak dau, ko it ongo guru guru sekolah minggu. Sabab pogi om kakal ih varo ulun rumikot sid gorija tiap minggu to gazadan dit Sundu Tosusi sidi tokou sokovai.

Ayat 42: Yoti banal ko magavi mogilin dit tudukan dit ongo rasul, miumpung nopo yoti dot mintadua om mirung makan. Emot dot banalko iso o ginavo, kopioonong om andus yoti. Banal ih ong varo dati pinibarasan amu  dati ma tomorong sid umung, ano ma ong gama mirung makan. Misanko minisavo ong varo pinibarasan ade om dati otomon makan sotorugakai. Jadi maiko miandus tokou sid saralom dot ongkop, jemaat om kampong supaya aso kotobon tokou sotorugakai makan ko sumbayang. Kokiraai ong varo purimon dot mad minsodu sid ongo kinoruhangan dot amu no mamung sid gorija ko iti ongo upakat dot kampong osuhul ong bertaubat om mozo no bo diti ongo upkat om mamung.

Ayat 43: It ongo rasul kopogimbulai dot kovogo vongo hiza diri, banal noko rumonok it ongoulun. Kakal ih sampai biano banalko harapon koi koronok dot ulun ong varo pdt dot kopogimbulai dot kovongo vongo yadko kengkod dot sakit, koponusub dot rogon om vokon vokon po. Ong sidi tokou to aso kovongo vongo emot tokou kuran no amu no bo rumonok tokou dit ongo pdt, penginjil ko it ongo humatul dot gorija? Kasip oku dot amu minudu tokou varo emot dot kovongo vongo om rumonok ko humarap ogi dit ongo gumazad tokou sid gorija. Emot dit gama tokou humopit dit ongo upakat sid gorija ko kampong banalko avantang. Iti no retan rumonok dot nokombangan.

Ayat 44: It ongulun kasip banalko miso sampai it nunu nopo nga managsaganu kovai. Bah kuran ong sidi tokou bianono kozuhu tokou yadko yoti? Om nunu noma ot kozuhu tokou? Kasip oku dot varo ih bo kozuhu tokou dot manangsanganu kovai, yadko siin persembahan tokou, ih tahak tokou iri ogi ih dagang dot iti om iti dang kogunano sokovai. It no kopudan dit gorija songo nopo to varot ulun kozuhu manahak om ih pasanganu kovai. Rontob nopo sokovai manangsanganu sokovai nga manaud ih ma. Varo no vagu kobolongkangan ong okon ko sokovai manaud. yadko iti somumut dot gorija sid saralom om sid natad gorija. Bang varo mongitung dot ombo ko yoti ino mogomomos, ko momuhau, ko mogama gorija ko vokon vokon. Amu no vagu kombangan ot pogitunan ong yadino.

Ayat 45: Asarok dot pojuval yoti dit ongo harata dioti om ih tahak ogi sid ulun dit varo kosompitan. Sidi dit tokou amu no bo ong ih tobus ot tanah ko valai ko kurita om ih tahak ogi ot horogo sid ulun dit asampat, topot kakal ih bo varo kotulungan tokou, yadko mogurukut, imbaan, rikoton mintadua, andahaon sid rumasakti. Om varo rukut kotulungan tokou RM50 ong otingal sid KK om RM30 otingal sid Kudat. It nobeti ot sinusuzan tokou.

Ayat 46: Tiap adau miumpung yoti sid panambayangan minta dua, mirung sid ongo valai dioti. Banal ko avanus ot ginavo om otomon yoti. Inti no koboutano dit ongulun Kristian hiza dino, om sampai biano nga yadino ih sid ongo gorjia pentongkop pomogunan. Ong kokiraai ong aso no koponong pong yadit buatan tokou osusah tokou bertobat, baiko somul monolioso dit kondiri, avanus ko kuran, ih gama humompit dit ongo upakat, minta dua, mirung om tumomon. Ong tumimpuun no dot aso maiko humagong koduruk, mumbangan vagu supaya omu kensodu antad sid boros dot Kitab.

Ayat 47: Mongindazou yoti dot Kinorigan om ih kozi yoti dot ulun vokon. Tiap adau varo ulun kamung dioti atad dit onsung dot Kinoringan supaya yoti nga kotorima ih dot kosopulan. It no guna dit miumpung tokou mendologoi om ohigak tokou om osuaw tokou sid ulun vokon, supaya omungan kogumuoo tokou sid gorija.

Onsi dot tudukan

            Migului tokou sid tema adau biano; Samod do Kinoringan puun dit sokovai. Nunu kah harati dot puun? Nunu harati dot Samod do Kinoringan?

Puun harati kinembulazan, kongkod, timpuunon om ogumu po harati. Samod do Kinoringan harati ih Tuhan Yesus ih minati bahagi dit tokou riniba supaya isai nopo ih magasip sid Dau amu no obinasa inoinga kasanganu di koposisan penlaid (Yohanes 3:16). Topot ong duaton ih kondiri tokou nunu harati diti ayat sid saralom koposisanku, nunu no ma? Topot bahagi dot Kinoringan ayat diti banalko agazo harati bahagi dit tokou riniba. Varo dua tolou hal dot agazo;

1) Ih samod do Kinoringan korikot sidi tokou hiza dot kakal ih amu kokotutun tokou di Yesus (Roma 5:8).

2) Ih samod do Kinoringan amu no kensodu sidi tokou, mulongko kapatazan, ko nunu no po kuasa pomogunan ko malikat (Roma 8:38-39).

 3) Iti guvas tokou intoronon dit Sundu Tosusi (1Korintus 6:19).

            Harati nunu nopo ih hal dot avantang sid koposizan tokou antad sid samod do Kinoringan. Kokirai ong mad aso not emot katagan sid saralom koposizan tokou, ongkop tokou, gorija tokou ko kampong tokou miuma do toliosoon banal it samod do Kinoringan varo ko kuran sid pialatan tokou. Okon ko harati dot aso it samod do Kinoringan nga harati ih tokou ot amu pagama dit samod do Kinoringan sid koposizan tokou. Nunukah harati dot amu pagama tokou di samod do Kinoringan? Ino no kakal ih amu kumiandus tokou, kakal humoliban tokou, kakal ih monimbaal tokou to mogindaraat dot koruhang, kakal ih obing kukuvaan tokou, patahu do hungot, kakal ih humarap tokou dot ulun vokon posurut dit gorija tokou, posurutan do kampong tokou, ko it katagan dit ongkop tokou. Iti no boroson dot kakal ih amu pagama dit samod do Kinoringan sid saralom koposizan tokou.

            Harati koduovo di samod do Kinoringan ino no madamod tokou di Tuhan Yesus.  Ogumu dati momoros manamod oku di Yesus kah? Topot kuran vaza manamod di Yesus to amu emot tokou? Kad dit Tuhan Yesus isa nopo manamod dit ulun vokon yadko Yoku no ot sinamadan dino ka (Matius 25: 40). Aso tinganan dot amu miasamod tokou to it no ih harati dit samod do Kinoringan. It ongoulun Kristian dit tumimpuun ih banalko it sid Yerusalem alangkas gumumu yoti om varo kovogo-govo ot agama dioti gima it rotuva di samod do Kinoringan ahakang to misasamod samod yoti. Ong kenginan tokou dot varo kavantangn ko kosurutan dit gorija tokou, ongkob tokou, kampong tokou ko it pomogunan Malaysia maiko manamod tokou dit ulun vokon, om kembulai ogi ih rotuva di samod do Kinoringan yadko it hiza dit ongo rasul.

Teologi Eskatologi / Teologi dit korikatan keduvo dit Tuhan Yesus.

            It ongulun hiza diri banalko kasip dot ih rumikot koduruk Tuhan Yesus sid hiza no dioti. (Pada zaman mereka). Iti no it koonsung dioti pujuval dit ongo tana, harta, valai dati ko nunu nopo. To amu no ketung yoti dot umpai dit anganak dioti to korikot no dino ih Tuhan Yesus. Kagi it ongo rasul nga yadino ih it etung dioti sampai ih rasul Paulus om it ongo rasul vokon nga yadino ih tudukan dau yadko it surat di rasul Pulus sid 1 om 2 Tesalonika. Om surat Ibarani 10:37. Surat Yakobus 5:8.

            Tanid no vagu ong hiza ditokou to mad aso no ketung dot rumikot no koduruk ih Tuhan Yesus. Banalko mongumpai tokou dot katagan dit anganak tokou, tanah valai, kurita, siin, palajaran om ogumu po, dot sampai osongkiking tokou do mansahari metotok sontoun tigogi Krismas no vagu. Iti nga maiko motupat tokou banal.

Lavis

            Hodomo tokou do banal, dot ih kuasa di Tuhan Yesus dino ino no samod, harati ong manamod tokou dot ulun vokon sino no ih kuasa dit Tuhan Yesus sid pilatan tokou. Om ih tokou nga kemot dit nogogama dit Tuhan Yesus yadko it nakasasi sid Kitab. Amin.